Magadansdísirnar

Menningarnæturdraumur

2004-08-20T11:21:00.000Z

Nú líður senn að Menningarnótt okkar borgarbúa með tilheyrandi lífi og fjöri. Borgin mun iða af menningu og látum við Magadansdísirnar þátttöku í gleðinni að sjálfsögðu ekki framhjá okkur fara. Við munum dansa á háalofti Hins Hússins, en húsið verður troðfullt af uppákomum hinna ýmsu sumarhópa Hins Hússins langt fram á kvöld.

Þetta verður svanasöngur okkar Magadansdísanna í samstarfi við Hitt Húsið í sumar og munum við því vera með einskonar yfirlitsmagadanssýningu yfir hluta af því besta sem við sýndum á þeirra vegum í samstarfinu.

Við dönsum tvisvar, fyrst kl.16:25 og stendur sýningin yfir í tæpan hálftíma. Svo endurtökum við prógrammið kl.17:55.

Við vonum að það eigi allir eftir að njóta næturinnar í borginni út í yrstu æsar.

Lokahátið... en þó ekki alger endalok

2004-07-09T02:33:00.000Z

Lokahátíðin í Ráðhúsinu var stórglæsileg. Allir þeir hópar sem ég sá koma fram voru mjög töff, skemmtilegir og hressandi (hver á sinn hátt). Krakkarnir sem mynduðu hópana voru einnig, margir hverjir, áhugaverðir karakterar. :)
Ég hefði viljað fylgjast betur með starfsemi hinna Skapandi starfshópanna í sumar en get sjálfri mér um kennt sökum annríkis og leti. Ég veit að ég missti af miklu.

Við dönsuðum á Ingólfstorgi í dag fyrir þáttinn Hjartslátt á Skjá einum. Það verður gaman að sjá hvernig það kom út. Þar voru nokkrir útlendingar sem stigu úr rútu sem kom frá Keflavíkurflugvelli og voru vægast sagt hissa að sjá austurlenskan dans á torginu. Af hverju ætli Ingólfstorg heiti annars Ingólfstorg?

Við munum líklega halda áfram að dansa eitthvað í sumar. Ef við myndum hætta núna, að hætti kaldra kalkúna, myndum við eflaust fá fráhvarfseinkenni og upplifa mikla vanlíðan.

Hér kemur svo smá korní kveðjuvísa:

Við lögðum af stað í ferð sem var hvorki mikils- né einskisverð.
Gerðum eitthvað úr engu og ekkert úr öðru og lærðum margt
sem við vitum ekki enn að við höfum lært.
Það sem við áorkuðum er kannski ekki mikið en við erum örlítið breyttar fyrir vikið.
Við höfum verið þreittar, þunnar, úrillar og ofkeyrðar en við lifðum það af og rúmlega það og þetta hefur verið gaman og gefið okkur margt.
Við þökkum ykkur sem voru með og komu að, sem unnuð ykkar starf og meira en það,
sem gerðu okkur greiða og tókuð ykkur tíma.
Það er dýrmætt að eiga eitthvað sem er ekki hægt að geyma
og mikilvægastar eru þær minningar sem auðvelt er að gleyma.
Ekki gleyma okkur!
Magadansdísirnar.

Myndir frá Lokahátíðinni

2004-07-08T01:33:00.000Z

Er búin að skella inn nokkrum myndum sem Elín vinkona tók. Skrifa svo eitthvað gáfulegra á morgun eftir góðan nætursvefni :)

Uppgjör fyrir lokadaginn

2004-07-05T01:22:00.000Z

Ég er að átta mig á því að tímabilinu okkar í þessu skemmtilega starfi hjá Hinu Húsinu er alveg að ljúka. Það eru bara þrír dagar eftir ... það verður voða skrýtið að hætta þegar við höfum verið í svona mikilli törn ... manni finnst þetta bara vera orðinn hluti af eðlilegu, daglegu lífi, að sýna magadans fyrir gestum og gangandi, sífellt að koma nýju fólki á óvart.
Ég get ekki sagt annað en að tímabilið hefi verið hið skemmtilegasta og lærdómsríkasta. Við stelpurnar í hópnum höfum kynnst enn betur en við gerðum og magadans er orðið aðeins þekktara fyrirbæri fyrir vikið. Ég vona að eftir törnina okkar í skapandi sumarhópunum munum við halda áfram samstarfi Magadansdísanna að einhverju leiti ...

Fyrir þá sem bíða örvæntingafullir eftir nýjum myndum af dísunum í myndaalbúminu okkar, þá eru myndir vonandi væntanlegar hvað úr hverju til okkar frá ýmsum aðilum.

Annars er það títt að við höfum verið að dansa undanfarið í nýju dísarbúningunum okkar, en það eru þægilegir toppar og falleg pils með peningabeltum ... og við erum allar í stíl, hver í sínum lit, við köllum þá blómabúningana okkar ... voða fínar!
Í gær dönsuðum við einmitt í búningunum, á einu því skemmtilegasta "giggi" hingað til ... á götumarkaði Klink og Bank ... stemningin var svo frábær, það hættu allir því sem þeir voru að gera og vildu ekki að við hættum. Við vorum mjög snortnar yfir viðbrögðunum og góðum anda.

Eins og ég sagði, þá eru þrír dagar eftir og nú gefum við allt í botn fyrir lokasprettinn!

Föstudagsflæði, bræði, æði, pæði, svæði og gæði.

2004-07-02T16:09:00.000Z

Föstudagsflæði:
Í dag dönsuðum við Magadansdísir á tveimur stöðum. Fyrst dönsuðum við á leikskólanum Laufásborg og síðan á seinasta Föstudagsflippi hins hússins.
Bræði?:
Á Laufásborg fór einn strákur að hágráta þegar við byrjuðum að dansa. Hann hefur kannski haldið að við værum grýlur eða nornir... eða kannski var tónlistin bara dáldið of hátt stillt fyrir viðkvæm eyru.
Æði:
Stelpurnar voru yfir sig hrifnar og héldu að við værum prinsessur sem ættu heima á klósettinu sem við skiptum um föt á.
Pæði:
Þegar við dönsuðum á Föstudagsflippinu var veðrið frekar grátt. Af þeim sökum voru ekki margir Íslendingar á ferð en mjög mikið var af útlendingum í skærlituðum regngöllum.
Svæði:
Í seinna skiptið sem við dönsuðum skiptum við um stað og vorum á Austurvelli í stað Lækjatorgar af pólitískum ástæðum sem eru mér ókunnar.
Gæði:
Þess ber að nefna að Steinar úr Hinu húsinu var mjög hjálplegur og sætur við okkur í dag. Ég kann alltaf betur og betur við þá Músarholunga. En þannig er það víst (og rannsóknir styðja)... að því oftar sem maður sér (eða heyrir) eitthvað, því betur líkar manni við það. ;)

Hvað hafa svo Magadansdísir verið að bardúsa undanfarið?

2004-07-01T02:15:00.000Z

Þar sem að þetta blogg er líka eiginleg lokaskýrsla er rétt að minnast á undanfarin "gigg".

Föstudagsflipp. Föstudagsflippið seinasta föstudag var einstaklega flippað... svo flippað að það var haldið í Kringlunni vegna leiðinlegs veðurs. Það var einstaklega góð hugmynd og fær Hitt húsið tvo þumla upp frá mér og gestum og gangandi fyrir vikið :)

Á félagsheimili alraðra á Aflagranda vorum við seinar. Eh, úps. Sem var mjög leiðinlegt... en, eftir að við dönsuðum var kátt á hjalla og við fengum appelsín og konfekt. Þar fengum við líka að glugga í Séð og heyrt sem við vorum í. Kristínu fannst myndirnar af sér vera ljótar... en mér finnst hún einstaklega fín á þeim öllum og kát og sæt (eins og alltaf). Mér fannst ég hinsvegar vera ljót á myndunum. En við gátum allavega allar verið sammála að Hrafnhildur var ýkt sæt á þeim. Það var mjög leiðinlegt að Sunna var ekki með okkur á myndunum. Hún var þarna á vappi rétt hjá þegar þær voru teknar... en of slöpp til að dansa í roki og rigningu.

Í Hafnarhúsinu var glatt á hjalla og mættu fleiri en hafa gert hingað til, sem voru gleðifréttir, nema fyrir þá sök að ég flæktist í slæðunni minni og varð að athlægi samdansara og áhorfanda. Sunna átti hvað erfiðast með að halda niðri í sér hlátrinum, enda yndæl stelpa sem samgleðst vinkonum sínum á gleðistundum sem þessum :(

Á Hareem sýningu magadanshússins dönsuðum við, ásamt öðrum magadanspæjum sem fóru á kostum. Síðan fórum við í magadanspartý heima hjá Josy með öllum skvísunum.

Á Kjarvalstöðum dönsuðum við daginn eftir og það mætti ein gömul kona og lítil stelpa sem var í samfloti með henni. Þær voru mjög ánægðar með einkadansinn en við vorum frekar þreittar og beiglaðar eitthvað.

Ólympíuleikar Ingunnarskóla í dag voru algjör snilld. Krakkarnir voru geðveikt skemmtilegir og fannst við mjög fyndnar að vera að dansa magadans. Þeir komu með nokkur snilldarkomment og ég átti erfitt með að skella ekki upp úr á meðan á dansinum stóð. Þegar við mættum var ég spurð hvort ég væri Stekkjastaur og þegar við fórum gargaði einn strákurinn: Hún horfði á mig allan tímann!

Leiðinlegast er samt að ég náði ekki neinum myndum frá þessum stöðum. Á sumum þeirra voru teknar myndir... en þær eru einhverstaðar á reiki í glundroða alheimsins og ólíklegt er að ég komist yfir þær... allavega í bráð.

Mér finnst líka mjög leiðinlegt að þetta tímabil sé bráðum á enda. Þetta er búið að vera allt of fljótt að líða. Hóparnir eru að gera svo góða hluti í því að auðga menningarlíf og kridda tilveruna. Þið eruð öll frábær... og þegar ég segi þið þá meina ég... ég. ;)

Endurnærðar

2004-06-25T10:12:00.000Z

Jæja, þá höfum við tekið okkur smá sýningarpásu og erum endurnærðar fyrir vikið. Sýningardagskráin hefst aftur hjá okkur í dag. Í sýningarpásunni náðum við að æfa okkur og bæta inn nýjum dönsum og gera dagskrána okkar enn fjölbreyttari ... en við höldum náttúrulega áfram að sýna hina dansana okkar líka, ásamt þjóðbúningadansinum vinsæla sem við sömdum fyrir 17.júní.

Það hefur verið staðfest að ekki verður af Föstudagsflippinu hjá úti-hópunum á Lækjartorgi í dag sökum veðurs .... en í staðin verðum við í Kringlunni!!! Það verður ekkert smá gaman að koma fólki þar á óvart!

Við vonum bara að enginn verði stórsvekktur, standi í rigningunni á Lækjartorgi og bíði eftir því að Magadansdísirnar stígi á stokk! ... :)

Annasamur laugardagur, afslappaður sunnudagur

2004-06-20T14:04:00.000Z

Á laugardeginum 19. júní var frekar mikið um að vera hjá okkur magadansdísum.
Við byrjuðum daginn á því að dansa í Hafnarhúsinu og Daníel tók myndir. Það var ekki mjög margt um manninn (hugsanlega vegna útskrifta Háskóla Íslands og kvennahlaupsins) en þeir sem á horfðu voru mjög hrifnir.

Eftir það skelltum við okkur á sundlaugargrill Götuhersins. Þar var hvílík stemning. Það var sumarfiðringur í fólkinu og allir hressir og kátir. Þegar við mættum var tónlistarflutningur í fullu fjöri í boði Eika og félaga. Kalli Dáðadrengjasnáði var svo indæll að taka myndir af okkur dansa. Auk þess tók hann nokkrar myndir af sér sem komu okkur magadansdísum skemmtilega á óvart (myndirnar má sjá undir hlekkinum: Grill götuhersins). Kalli ætti kannski bara að fara að snúa sér að ljósmyndabransanum því myndirnar voru margar hverjar helvíti skemmtilegar verð ég að segja. Í grillinu var skorað á okkur í magadans "battle" en við urðum að svíkjast undan þeirri áskorun, með loforði um að standast hana síðar, því við vorum að verða of seinar á næsta dansstað. Ég held mér sé óhætt að segja að ég muni mæta í grillveislur öryrkja héreftir... þar er sko haldið uppi almennilegu fjöri.

Eftir það dönsuðum við í brúðkaupi. Brúðurin var í rosalega flottum kjól (enda er það víst hefðin). Í brúðkaupinu var ég næstum búin að kveikja í slæðunni minni með því að sveifla henni yfir kerti sem voru á borðinu en rétt slapp. Guðmundur Bjargmunds tók myndir fyrir okkur, enda prýðispiltur.

Þarnæst skelltum við okkur í afmæli Ragnhildar magadansmærar. Veitingarnar í afmælinu voru lygilega góðar... svo ekki sé minnst á frábæra bollu. Þegar líða tók á kvöldið skemmti Helga Braga gestum með grínleik og dansaði fyrir þá magadans. Magadansdísirnar stigu svo á stokk með gestadansaranum Önnu Dóru Ófeigsdóttur. Josy Zareen magadanskennari okkar tók myndir af öllu saman fyrir okkur sem var frábært nema fyrir þá sök að það tók enginn mynd af henni :( Ragnhildur var hæstánægð með Helgu og okkur hinar og við vorum alveg jafn ánægðar með hana og frábæra veislu.

Í dag (sunnudegi) dönsuðum við síðan á Kjarvalsstöðum í hádeginu. Ljósmyndari Músarholunnar kom og tók myndir. Hann á flotta myndavél og flotta skó.

Magadanskveðja... Malika

Tímabilið hálfnað

2004-06-20T13:15:00.000Z

Þá er skapandi-sumarstarfs-tímabilið hjá okkur hálfnað. Nú breytast áherslur hópsins lítillega. Við höfum verið með mikið kynningarstarf í gangi sl. þrjár vikur, sýnt þaulæfða dansa vítt og breytt um borgina fyrir ólíku fólki og komið fram í fjölmiðlum. Við höldum því starfi auðvitað áfram, en áherslan á þann þátt starfsins mun minnka núna.

Í síðustu viku byrjuðum við að semja dansa og sömdum meðal annars 17.júní dansinn okkar. Næsta vika fer að miklu leyti í það að semja vandaðan, frumsaminn dans sem hópurinn sýnir í Ráðhúsinu 7.júlí. Einnig erum við að skoða samstarf við tónlistarfólk til að troða upp með okkur í Listasafni Reykjavíkur einhverja helgina.

Þessar síðastu vikur hafa verið mjög annasamar hjá hópnum og við höfum komist að því hvað það tekur mikið á að vera í sýningargeiranum og sýna á hverjum einasta degi. En það er líka alveg ofsalega gaman hjá okkur og ég verð að segja, að það er svo frábært fyrir hópinn að hafa fengið þetta tækifæri til að framkvæma hugmyndir okkar og fá að vinna við þær. Alveg einstakt tækifæri. Ég er Hinu Húsinu afar þakklát.

Magadans í íslenska þjóðbúningnum

2004-06-19T11:36:00.002Z

Á Þjóðhátíðardaginn dönsuðum, niðrí miðbæ Reykjavíkur, við frumsaminn slæðudans og umbreyttan hópdans í búningum sem minntu á íslenska þjóðbúninginn við góðar undirtektir. Við höfum ákveðið að endurtaka leikinn á morgun (sunnudag) í Listasafni Reykjavíkur - Kjarvalsstöðum kl.12 fyrir þá sem misstu af okkur á 17.júní.

Annars munum við líka gera dansinn í dag í Hafnarhúsinu, en þá verðum við bara tvær, sökum anna hjá hinum ...

Myndir frá 17. júní 2004

2004-06-17T20:24:00.000Z

Jæja, núna eru myndir frá 17. júní komnar inn.

Ljósmyndari: Guðmundur Bjargmundsson

Gleðilega þjóðhátíð!

2004-06-17T11:32:00.000Z

Jæja, nú er komið að því, við Magadansdísirnar stígum á svið seinna í dag á Þinpallinum svokallaða norðan við Ráðhúsið klukkan 15:35.

Síðustu dagar hafa farið í að klára búningana okkar og semja og æfa dansinn. Það var ekki fyrr en loksins í gær sem allt small saman, búningarnir passa á alla og atriðið okkar fullklárað og æft. Það er óhætt að segja að við verðum glæsilegar, þó ég segi sjálf frá.

Lokaæfingin var í gærkvöldi í sal Þórshamars og æfðum við til að ganga eitt í nótt. Josy og Kata kíktu yfir á okkur og gáfu okkur nokkra punkta hvað mætti betur fara og hvað væri flott. Það var mjög gott að hafa þær á staðnum og fá smá innsýn í sjónarhorn áhorfandans.

Þrátt fyrir mikið annríki undanfarna daga þá tókum við okkur tíma og dönsuðum fyrir unglinana á Droplaugarstöðum í gær, og fengum heldur betur góðar undirtektir.

Ég tók nokkrar myndir af okkur í nýju búningunum og að æfa en ég set þær ekki inn fyrr en í kvöld, eftir að við erum búnar að koma fram í þeim.

Nú er bara að flykkjast niður í miðbæ í góða veðrinu og syngja "Hæ, hó, jibbí jei og jibbí jei, það er kominn sautjándi júní"

Minnisleysi

2004-06-16T09:52:00.000Z

Við komum fram í Ísland í bítið í morgun. Þar dönsuðum við bæði og töluðum .... eða ég talaði réttara sagt. Ég talaði og talaði, en ekki um það sem ég ætlaði að tala ... ég sagði frá Hinu Húsinu og Magadanshúsinu og svo talaði ég um magadans almennt, kynnti svo dansinn sem við vorum að fara að dansa ... en gleymdi alveg að segja það sem við komum í þáttinn til að segja. Við vildum nefnilega auglýsa Listasafnssýningarnar okkar allar helgar fram að 4.júlí. Ég gleymdi meira að segja að segja frá heimasíðunni okkar, sem hefði kannski reddað mér smá!!!

Viljiði gera mér greiða, þeir sem lesa þetta, komiði endilega í Listasafn Reykjavíkur um helgina og sjáið okkur dansa í:
Hafnarhúsinu á laugardaginn klukkan 14 og
Kjarvalsstöðum á sunnudaginn klukkan 12 ...

Takk Kristína.

Fjölmiðlafár

2004-06-15T16:47:00.000Z

Vá, við erum ekki búnar að vera nógu duglegar að fygjast með fjölmiðlunum. Við höfum víst verið voða mikið í þeim undanfarna daga, ég hef séð tvær myndir af okkur í blöðunum en frétt af fleiru, þetta er listi yfir þá fjölmiðla sem ég veit að við höfum birst í:

Fréttablaðið - mynd frá því að við dönsuðum á bakka Vesturbæjarlaugar
Grapevine - uppstillt hópmynd af okkur sem ljósmyndari Hins Hússins tók
Morgunblaðið - mynd frá Föstudagsflippinu þar sem við dönsuðum á Lækjartorgi
Sjónvarpið - mynd af okkur að dansa á Lækjartorgi í lok fréttatímans
Stöð 2 - myndir af okkur að dansa á meðan fjallað var um Föstudagsflippið

Á næstunni:
Stöð 2 - við munum dansa í Ísland í bítið í fyrramálið
Séð og Heyrt - þar koma myndir og umfjöllun um hópinn bráðum

Og hver veit hvar við komum svo fram næst ...

Barnaspítalinn og Barónsborg

2004-06-15T15:55:00.000Z

Í gær dönsuðum við á leikskólanum Barónsborg og í dag á Barnaspítala Hringsins. Allir voru hressir og kátir á báðum stöðum, magadansdísir, starfslið og áhorfendur. Byggingarnar voru báðar nýlegar og fallegar. Barnaspítalinn er ótrúlega flottur að innan. Það var eins og að vera komin til útlanda að vera þarna inni. Kannski skellir maður sér þangað aftur, verslar í mötuneytinu, fer í sólbað og síðan á fyllerí... því þannig gerir maður víst í útlöndum. Spurning hvort það verði þó jafn vel þegið og dansinn.

Karatefélagið Þórshamar bjargar Dísunum

2004-06-15T10:54:00.000Z

Nú þegar standa yfir strangar æfingar í Magadanshúsinu vegna 17.júní, sáum við ekki framá að geta samið og æft 17.júní atriðið okkar í húsinu á skikkanlegum tíma. Magadansdísirnar leituðu því til Karatefélagsins Þórshamars til bjargar, sem eru bara í næsta húsi, og þeir réttu fram hjálparhönd.
Þórshamar við erum í þakkarskuld við ykkur, þið eruð æði. Þvílíkir öðlingar!

Sunnudagur til sælu

2004-06-14T09:28:00.000Z

Sunnudagur var langur vinnudagur hjá okkur stelpunum.
Hann byrjaði í rauninni á laugardeginum, þegar við vorum langt fram á nótt að leggja lokahönd á búningana okkar fyrir daginn. Við ákváðum nefnilega að prufukeyra 17.júní-pilsin okkar og gerðum hanska í stíl.

12:00 Fyrsta sýningin var í Listasafni Reykjavíkur - Kjarvalsstöðum ... það var mjög fámennt, ég held ég hafi talið átta áhorfendur, þar af voru tveir starfsmenn safnsins! En vonandi fáum við meiri traffík þangað næst vegna þess að rýmið þar er tilvalið til að dansa í.

14:00 Næst dönsuðum við í Árbæjarlaug, það var allt önnur upplifun. Við röðuðum okkur í kringum innilaugina og dönsuðum fyrir laugargestina. Það var æðislegt, það var eitthvað svo töfrandi að vera þarna í birtunni sem endurspeglaðist á vatninu og glerhúsinu með tónlist sem bergmáliaði um allt. Það var líka alveg fullt af fólki í sundi og góð stemning.

15:00 Síðast dönsuðum við á Árbæjarsafni, þar var hvassur skúr og blautt gras ... en við ákváðum samt að dansa úti, þó að okkur hefði boðist að dansa inni! Við dönsuðum alveg heillengi í blautu grasinu fyrir gesti og starfsmenn safnsins við góðar undirtektir. Þau voru greinilega alveg að kaupa allar andstæðurnar sem voru í gangi þarna.
Ljósmyndari Séð og Heyrt kom og tók nokkrar skemmtilegar myndir af okkur og lopapeysunum, en að því loknu bauð safnið okkur uppá að koma inn á hlýjuna og gæða okkur á lummum og heitu kakói við fiðluleik, sem var vel þegið!

Restin af deginum og kvöldinu fór í að klára að semja 17.júní atriðið okkar og klára búningana fyrir það. Framundan er svo að gera enn einn hópbúninginn og semja annann dans fyrir Ráðhússýninguna ... auk þess að halda áfram að sýna út um allt.

Hafnarhúsið

2004-06-12T17:20:00.000Z

Við magadansdísirnar dönsuðum í Hafnarhúsinu í dag. Við fengum góðar viðtökur í Hafnarhúsinu bæði frá hjálpsömu starfsliði og áhorfendum. Ég var svo fegin að við vorum ekki bókaðar að dansa úti í dag því veðrið er ömurlegt. Hvasst, kalt og rigning. Veðrið hefur fylgt okkur vel eftir og í flestum tilvikum verið alveg kjörið miðað við dansstað.
Ljósmyndarinn okkar þurfti því miður (fyrir okkur) að bregða sér út úr bænum í sumarbústað núna um helgina en við erum að skoða það að fá gestaljósmyndara með okkur á morgun. Það væri mjög hressandi, sérstaklega í ljósi þess hve þéttskipuð dagskráin okkar er þá.

Flippað Föstudagsflipp

2004-06-11T15:24:00.000Z

Það var alveg magnað að sýna á Lækjartorgi, við sýndum sömu fjölbreyttu dagskrána tvisvar með klukkutíma millibili. Í fyrra skiptið var góður slatti af fólki á ferli en í seinna skiptið fannst mér torgið hreinlega fyllast af fólki. Þarna var fullt af ljósmyndurum, ég veit að tveir voru allavegana frá Hinu Húsinu og Morgunblaðinu en svo kom einhver sjónvarpsstöð og tók okkur upp að dansa!!!... kannski að maður verði í fréttum á RUV, aldrei að vita???
Þetta var svaka fjör, og ég hlakka bara mjög til þess að endurtaka leikinn 25.júní!

Kristina ljósmyndafyrirsæta :)

2004-06-11T11:43:00.000Z

Vil benda á mynd í fréttablaðinu á síðu 22 sem er af Kristinu að dansa við vesturbæjarlaug.

Duglegar magadansdísir með meiru!

2004-06-10T22:09:00.000Z

Við dönsuðum á tveimur stöðum í dag. Fyrst á dvalarheimili aldraðra við Lönguhlíð 3 og síðan á leikskólanum Listakot. Veðrið var frábært og við fengum mjög góðar viðtökur á báðum stöðum. Bróðir minn, Daníel, kom með okkur og tók myndir (því hann er kúl). Myndirnar koma á síðuna, eh... kannski á morgun. Bara ekki núna, því ég er úrvinda eftir erfiðan en þó dáldið magnaðan dag.
Góða nótt... eða öllu heldur gott kvöld, zzzzzzzz.

Vesturbæjarlaug

2004-06-10T08:45:00.000Z

Það var æðisleg tilfinning að vera á bakkanum á Vesturbæjarlauginni í gær og dansa utandyra í dýrðarveðrinu sem þá var. Þótt það hafi gengið mjög vel þá vorum við því miður bara þrjár, en Hrafnhildur er enn heima með hita!
Við fengum mjög breiðan og skemmtilegan áhorfendahóp, skólunum var greinilega lokið, þannig að laugin var full af krökkum, sem voru að hefja sumarfríin sín, eldri fastagestum laugarinnar og fleira fólki og viðtökurnar voru æðislegar.
Þegar við mættum á staðinn, var ljósmyndari Músarholunnar mættur á svæðið, eins og um var rætt, en þar var líka ljósmyndari Fréttablaðsins, okkur alveg að óvöru. Þegar við höfðum dansað það sem við höfðum ákveðið að dansa þarna á bakkanum og lögðum af stað í humátt að búningaklefunum, vorum við beðnar að dansa meira ... svo að við skelltum okkur bara aftur í dansstellingarnar og héldum áfram. Sem betur fer hafði ég óvart tekið með mér meiri tónlist.
Þetta var æðislegt, þetta sumar er æðislegt!

Ballið byrjar

2004-06-09T10:35:00.000Z

Jæja, þá byrjar ballið, við hefjum sýningarlotuna í dag og hún helst vonandi í einni strikklotu til 7.júlí. Þetta gengur alveg vonum framar hjá okkur, við erum bókaðar með "gigg" alla daga fram til 19.júní og í dag verður prófraunin í Vesturbæjarlaug kl.14 ... kannski að við ættum samt að taka okkur 1-2 frídaga á tímabilinu, þar sem við sýnum ekki, en æfum bara ... eða förum í sund?

Dagurinn í dag...

2004-06-09T08:59:00.000Z

Hæp, þar sem ég þori ekki aðhringja svona snemma, getur einhver sagt mér hvernig dagurinn í dag verður? Mætum við ýkt hressar í vesturbæjarlaug eða...?
Sú fyrsta sem sér þetta má endilega slá á þráðinn til mín. Svo vil ég nota tækifærið og hrósa ykkur stelpur hvað þið hafið verið duglegar, og sjáumst í hádeginu, eftirmiðdaginn og í kvöld... hehe :D
Leider :)

Myndaalbúm og veikindi

2004-06-08T15:30:00.000Z

Jæja stelpur, maður getur nú ekki verið eftirbátur ykkar í tæknimálum. Þar sem ég sit veik heima og læt mér leiðast þá ákvað ég að fara að fikta með að setja inn myndaalbúm fyrir okkur eins og við vorum búnar að tala um. Fann eitt sem mér fannst koma vel út (og er ókeypis) og setti prufualbúm hérna inn til hliðar. Það eru engar flottar myndir komnar inn ennþá, bara prufumyndir. Þurfum samt að hittast og ræða hvernig er best að hafa lúkkið á þessu, er búin að prófa ýmislegt og finnst koma best út að hafa Myndaalbúmið sér, ekki undir "Linkar", svona eins og er núna hérna til hliðar.

Ljósmyndasessjón

2004-06-08T00:40:00.000Z

Við Magadansdísirnar fórum á heillangt ljósmyndasessjón í dag (í gær). Ljósmyndari Músargildru Hins Hússins kom í Magadanshúsið, þar sem við stilltum okkur upp, í eyðimörkinni, í fullum skrúða, en myndirnar verða meðal annars notaðar í Grapevine sem á að koma út á föstudaginn!
Eftir að ljósmyndarinn fór, héldum við sessjóninu áfram, vegna þess að Sunna hafði komið með myndavélina sína. Við vorum mjög lengi að, loksins fengum við stelpu, sem var að bíða eftir að æfing hjá Josy byrjaði, til að smella af (fullt af) myndum af okkur öllum saman.
Aumingja Hrafnhildur var alveg að mygla vegna þess að hún var orðin veik og komin með hita ... en hún var algjör hetja að halda þetta út með okkur.
Svo koma myndirnar vonandi bara sem allra fyrst inná síðuna hjá okkur!

Jább frábær æfing

2004-06-07T08:57:00.000Z

Ákvað að blogga svona í fyrsta sinn, vil ekki vera ótæknivæddasta stelpan í hópnum. Fín æfing í gær, þrátt fyrir smá þreytu hjá mér. :)
Ég er líka mjög ánægð með búninga-hönnunina okkar, nú er bara að farað skella sér í saumaskapinn. Ég ætla að taka með myndavél á næstu æfingu og þá er hægt að sjá svona í meginatriðum hvað við erum að gera.
Allavega,
sjáumst í kvöld :)

Sunnudagsæfing

2004-06-07T02:31:00.000Z

Þetta verkefni er svo spennandi, við dísirnar höfum verið alveg á kafi undanfarna viku og erum alveg að fíla okkur í tætlur. Ég hef lært svo mikið óskilt magadansi á þessarri fyrstu viku, er til dæmis orðin mellufær í html-i, css-i og hex-litum! ... mjög áhugavert!
Annars hófum við þessa viku í dag, á langri magadansæfingu í Magadanshúsinu, undirbjuggum upptoðninga vikunnar og tókum dramatískar búningaákvarðanir.
Nú er bara að standa sig, við höfum fengið svo jákvæð viðbrögð við verkefninu og framundan eru fundir, æfingar, bókanir, sýningar og ljósmyndanir og hver veit hvað fleira?

Fordómar?

2004-06-04T16:19:00.000Z

Ég hringdi í sakleysi og hamingju í hjúkrunarheimili í dag til að bjóða fram skemmtun í formi magadans. Ónefnd forstöðukona heimilisins spurði mig hvort mér þætti viðeigandi að vera með erótískan dans á elliheimili, sagði að hún hefði engan áhuga á skemmtuninni og skellti svo á. Get ekki annað en velt því fyrir mér hvort að hún hefði látið eins væri ég fiðluspilari í sömu hugleiðingum. Sem betur fer eru tilfelli sem slík í minnihlutahópi og fara minnkandi með aukinni þekkingu landans á austurlenskum dansi. Tel jafnframt að þetta sumarverkefni sé skref í rétta átt hvað það varðar.
Glaðar baráttukveðjur.

Mitt fyrsta blogg -EVER- :)

2004-06-04T14:06:00.000Z

Jæja, ég verð nú bara að segja að ég er þó nokkuð sátt við nafnabreytinguna okkar, kemur mjög vel út (sérstaklega við bleiku síðuna okkar :)

Ég er búin að hringja á nokkra staði, það er ótrúlegt hvað svona lagað getur tekið langan tíma, hringja hingað, hringja þangað, tala við þennan, þessi er ekki við... osfrv. En þetta er samt gaman, er nú þegar komin með nokkrar dagsetningar fyrir okkur. Þurfum góðan fund eftir helgi til að koma dagskránni okkar heim og saman.

oohhh... þetta verður svo gaman hjá okkur stelpur! :D

Magadansdísirnar

2004-06-04T10:28:00.000Z

Þá hefur nafnabreyting hópsins verið formlega tilkynnt á alla þá staði sem mikilvægt er að tilkynna slíkt ... TIL HAMINGJU MEÐ NÝTT OG STELPULEGRA NAFN!

Fyrsta vikan

2004-06-03T10:35:00.000Z

Jæja, þá eru hlutirnir að komast á skrið ... erum loksins að skríða uppúr veikindunum og svoleiðis.
Fyrsta vikan hefur verið svolítið ólík því sem við bjuggumst við, en framhaldið mun snúast meira um að semja og æfa magadans og að sýna hann. Við höfum aðallega sótt fundi, rætt skiplulagsatriði, hafið bloggsíðuna, rætt búningahugmyndir, hlustað á tónlist og safnað saman símanúmerum félagsheimilinna og fleiri til að hringja í. En svona vinnu verðum við víst að byrja á til að útkoman á stafinu verði góð.

Hlakka til að byrja að dansa af krafti, Kristína.

Fyrsti starfsdagurinn

2004-06-01T11:12:00.000Z

Jæja, þá hefst fyrsti starfsdagur Magadanshópsins Dóranna. Hann hefst á því að við hittum alla hina hópana sem starfa við "skapandi sumarstörf" hjá Hinu Húsinu í sumar og hver hópur kynnir sína starfssemi. Í rauninni hófst starfssemin óformlega hjá okkur í gær þegar við hittumst, ræddum um sumarstarfið og æfðum sýningaratriðið fyrir fundinn í dag ... framá miðnætti.
En nú veit ég ekki hvernig þetta kemur út hjá okkur í dag, þar sem að helmingur hópsins (við Heiða) erum orðnar lasnar, og hinn helmingurinn (Sunna og Hrafnhildur) þurfa að fara kl.14!

Ég vona bara það besta. Kristína.